Naceu no ano 1994 baixo a dirección de Moncha Prieto, daquela tamén presidenta de ERGaC. Moncha conseguiu a colaboración do Servicio de Radio Exterior da Radio Galega, e tivo no programa como colaboradores habituais a Manuel Mandianes e mais a César del Caño, por citar soamente algúns. En 1995 Moncha voltou a Galiza deixando a dirección do programa en mans de Xosé M. Sancho e mais de Antón Fernández. Moitos colaboradores pasaron entón polo programa: César Guzmán desde Lugo, Bieito Romero desde A Coruña ou o músico Iago Mejuto. O ano 2001 o programa fixo unha pausa para voltar ás ondas no 2003, dirixido por Antón Fernández, en Sants 3 Ràdio. O director é arestora Suso Mon, e ten dous colaboradores habituais xunto aos que bota adiante dúas horas amenas e de contidos moi amplos, Helena Dominguez e Martí Aviñoá. Co gallo do accidente do Prestige incorporouse tamén ao equipo Xosé Manuel Conde, profesor de ciencias e membro de Furafollas Agrupación Teatral, que no espacio “Ondas Negras” nos informou da situación da costa galega logo do afundimento do petroleiro, amais das novidades que se estean a producir. A literatura galega chega cada sábado da man do director, Suso Mon, un informático galego e apaixonado lector, que nos permite gozar do espacio semanal “Letras galegas”. O equipo de Galiza...algo máis encargouse da cobertura informativa da manifestación do 23 de febreiro do 2002 en Madrid, en protesta pola marea negra. Durante a tempada 2004-2005 o programa, que acadou unha calidade informativa nunca encontrada na radio galega en Cataluña, traballou para achegar toda a actualidade políticosocial de Galicia á cidadanía catalá. Desta maneira, todos os sábados o programa inclúe dúas ou tres entrevistas: a escritores, a políticos ou ben a persoas que estan de actualidade por un ou outro motivo, como é o caso da popular Ramona Maneiro, que se fixo tan coñecida a raíz da película Mar Adentro. O programa máis importante que fixo ultimamente o equipo do Galiza… Algo máis, en colaboración con Ana Belén Real, Eduard del Castillo (ambos os dous do programa Aturuxos) e mais de Paco Castro (membro do Bloque Nacionalista Galego en Barcelona), foi o Especial Eleccións Galegas 2005, o pasado 19 de xuño, con motivo da celebración da convocatoria electoral que tiña que escoller novo presidente para o Goberno da Xunta de Galiza. Durante o programa interviron, por unha banda, os directores dos xornais El progreso de Lugo, La voz de Galicia, El Faro de Vigo, o ex-director do portal electrónico de noticias Vieiros, Anxo Quintela, o redactor xefe do periódico A Peneira, Antón Fernández, e mais Ramom Gonçalves, director do periódico Novas da Galiza. Doutra banda, e representando á prensa catalá, interviron: Antonio Franco, director de El periòdico de Catalunya, Francesc Valls, periodista de El país, e tamén representantes dos xornais La Vanguardia e mais El punt. No que fai ás voces dos partidos políticos, entrevistáronse telefonicamente Encarna Otero, do BNG, Ceferino Díaz, do PSdG-PSOE e mais X.L. Mendez Ferrín, o coñecido escritor galego que foi candidato á presidencia da Xunta pola FPG (Frente Popular Galega). Tamén dende os partidos cataláns colaboraron no programa membros de todos os partidos con representación no Parlament de Catalunya. O Especial Eleccións do Galiza… algo máis foi a plataforma a traves da que, tanto os galegos residentes en Barcelona como os cataláns, puideron coñecer de primeira man o desenvolvemento do escrutinio dos votos ata o momento de sabérense os resultados finais, porque o programa comezou repasando os perfís dos candidatos e dando unha panorámica histórica dos partidos que se presentaron, continuou coas enquisas a pé de urna e acabou dando os resultados oficiais a medida que ían saíndo. Soamente coa crónica deste programa xa intuímos a calidade e a vontade que o equipo do Galiza… algo máis demostra á hora de botar a ollada semanal sobre Galicia. É un traballo que cómpre agradecer, en grande medida, ao seu productor: Martí Aviñoà. No ano 2007, o programa recibiu o segundo premio entre os mellores programas de radio en galego feitos na Galicia exterior.